U.D i Presidentit, Dr. Jakup Krasniqi takoi përfaqësuesit e subjekteve politike që do të marrin pjesë në zgjedhjet e 12 dhjetorit

Ushtruesi i Detyrës së Presidentit të Republikës së Kosovës, Dr. Jakup Krasniqi pati sot një takim me përfaqësuesit e subjekteve politike, të cilat do të marrin pjesë në zgjedhjet e përgjithshme të 12 dhjetorit.

Në këtë takim u diskutua rreth tekstit të deklaratës së përbashkët të të gjitha partive politike të cilat garojnë në zgjedhjet e 12 dhjetorit 2010, deklaratë kjo e cila ka të bëjë me kodin e sjelljes në këto zgjedhje.

Pas, këtij takimi në një konferencë me gazetarë, Ushtruesi i Detyrës së Presidentit, dr. Jakup Krasniqi, tha se “ne sot e patëm një takim me partitë politike që janë të regjistruara në Komisionin Qendror Zgjedhor dhe kemi ofruar një tekst të një deklarate, që ka të bëjë me një kod të mirësjelljes në zgjedhjet e 12 dhjetorit 2010”.

“Ne biseduam rreth kësaj. Ishin disa vërejtje. Vërejtjet që u dhanë sot do t’i ndryshojmë në tekstin e ri dhe të hënën në mënyrë ceremoniale partitë politike që garojnë në zgjedhjet e 12 dhjetorit 2010, do të nënshkruajnë këtë deklaratë të mirësjelljes për zgjedhjet e jashtëzakonshme ose të parakohshme të këtij viti”, shtoi z. Krasniqi.

I pyetur nga gazetarët pas takimit, U.D i Presidentit, Dr. Jakup Krasniqi tha se përmirësimet që duhet të bëhen në tekst më tepër janë përmirësime gjuhësore sesa  përmbajtjesore.

“Pika dy, fjalia e fundit thotë se partitë, anëtarët dhe kandidatët e tyre zotohen se do të mbështesin konceptin universal një person një votë dhe do të diskurajojnë votimin në emër të dikujt tjetër. Kjo pjesa e fundit u tha që jo diskurajojnë po pengojnë votimin në emër të dikujt tjetër. Pika katër thotë se partitë dhe anëtarët dhe kandidatët e tyre do të dënojnë publikisht dhe në mënyrë të përsëritur çdo dhunë ose kërcënim të cilitdo shtab, këtu u tha edhe në vendvotim. Çdo gjuhë apo veprim që mund të shkaktojë frikësim ose të nxit dhunë. Pra, janë kryesisht vërejtje gjuhësore  dhe ne u dakorduam që t’i bëjmë këto ndryshime dhe në ditën e hënë në ora 11:00, në mënyrë ceremoniale, do të nënshkruhet kjo deklaratë e kodit të mirësjelljes për zgjedhjet e 12 dhjetorit 2010”, tha z.Jakup Krasniqi.

A jeni ju dhe të tjerët të sigurt që do të respektohet gjatë fushatës ky kod, ishte pyetja në vijim duke u përgjigjur në të cilën z.Krasniqi tha: “Ne kërkojmë që të respektohet kodi i mirësjelljes dhe ne si individë do të sillemi në raport me kodin e mirësjelljes. Ju e dini se këtu kemi të bëjmë edhe me subjekte politike, edhe me qytetarë që nganjëherë nuk janë krejt bash mirësjellës, por qëllimi është që vërtet gjatë gjithë fushatës, por në mënyrë të veçantë edhe në ditën e zgjedhjeve, edhe partitë politike, edhe kandidatët, edhe qytetarët që dalin në zgjedhje, edhe përfaqësuesit e partive politike që janë në zgjedhje, vërtet të shkojnë atje për ta kryer një detyrë qytetare, një të drejtë qytetare dhe të votojnë. Ne bëjmë apel që qytetarët vërtet ta ruajnë qetësinë dhe të votojnë për subjektin apo individët që mendojnë që do t’i bartin në institucionet e Kosovës interesat e qytetarëve të Republikës së Kosovës”.