Presidenti Thaçi takoi homologun e tij bullgar, flasin për rritjen e bashkëpunimit ekonomik

Presidenti i Republikës së Kosovës, Hashim Thaçi, i cili po merr pjesë në samitit e SEECP-së në Bullgari, ka zhvilluar edhe një takim bilateral me homologun e tij bullgar, Rosen Plevneliev.

Të parin e Bullgarisë, presidenti Thaçi e ka falënderuar për përkrahjen që shteti bullgar i kanë dhënë Kosovës për anëtarësim në organizata ndërkombëtare dhe për procesin e integrimit evropian.

Presidenti Thaçi ka thënë se hyrja në fuqi e MSA-së dhe rekomandimi për vizat janë vërtetim i reformave të suksesshme dhe të thella të Kosovës, në ndërtimin e institucioneve demokratike, në ekonomi dhe në sundim të ligjit.

“Kosova tashmë është konsoliduar brenda dhe jashtë si shtet. Në rajon jemi bërë shembull i dialogut dhe bashkëpunimit. Dialogu me Serbinë ka ndihmuar në integrimin e pjesës veriore të Kosovës në institucionet e Kosovës, por ka reflektuar edhe në stabilizimin e rajonit”, ka thënë presidenti Thaçi, duke shtuar se me shtetet e rajonit duhet të thellohet më shumë edhe bashkëpunimi ekonomik.

Nga homologu i tij bullgar, presidenti Thaçi ka kërkuar përkrahje të mëtejme edhe për anëtarësimin në konventa dhe organizata tjera ndërkombëtare, si Këshilli i Evropës.

Në anën tjetër, Presidenti i Bullgarisë, Rosen Plevneliev, ka thënë se Bullgaria dhe Kosova kanë marrëdhënie të shkëlqyera dhe se bashkëpunimi ynë duhet të zgjerohet edhe në sferën e ekonomisë.

Presidenti Thaçi dhe homologu i tij bullgar kanë shkëmbyer mendime edhe për gjendjen në Ballkanin Perëndimor dhe për perspektivat zhvillimore të rajonit në aspektin politik, ekonomik dhe në fushat tjera të rëndësishme.