Presidenti i Republikës së Kosovës, dr. Fatmir Sejdiu e përshëndeti përmbylljen e suksesshme të raundit të dytë të zgjedhjeve për kryetar të Komunës së Parteshit.
Në vijim po e japim të plotë deklaratën e Presidentit Sejdiu:
Përmbyllja e suksesshme e raundit të dytë të zgjedhjeve për kryetar të Komunës së re të Parteshit, në të cilën pjesa dërmuese e qytetarëve janë të nacionalitetit serb, dëshmon se qytetarët e kësaj komune janë të përkushtuar që t’i shfrytëzojnë mundësitë që ua ofron Kushtetuta e vendit për të ndikuar drejtpërdrejt në qeverisjen lokale dhe në përmirësimin e mirëqenies së tyre jetësore. Ndërsa, pjesëmarrja e lartë e qytetarëve edhe në raundin e dytë të këtyre zgjedhjeve është përgjigja më e mirë ndaj të gjithë atyre që e kundërshtojnë integrimin dhe perspektivën e jetës së përbashkët të të gjithë qytetarëve të vendit.
Institucionet e Republikës së Kosovës janë të vendosura që të punojnë edhe më tej për jetësimin e obligimeve që kanë marrë para qytetarëve të vendit dhe para bashkësisë ndërkombëtare për ndërtimin e një të ardhmeje më të ndritshme për të gjithë qytetarët e vendit pa dallim etnie e besimi
Kryetarit të porsazgjedhur, Nenad Cvetkoviq, i urojmë sukses në detyrën e re dhe realizim të projektit të tij për Parteshin, me të cilën mori besimin e shumicës së qytetarëve të kësaj komune. Po ashtu, përshëndesim edhe kundërkandidatin e tij, z. Todor Mirkoviq për garën korrekte, si dhe punën e institucioneve të vendit, KQZ-në, qytetarët, subjektet politike pjesëmarrëse në zgjedhje si dhe institucionet ndërkombëtare, të cilat e ndihmuan këtë proces.
Ky postim është gjithashtu i disponueshëm në gjuhë: SR